Бишкектин мэриясында кадрдык өзгөрүүлөр болду

‹›

Бишкектеги мэрияда кадрдык өзгөрүүлөр болду. Мэриянын маалымат кызматы билдиргендей, Илияс Сексенбаевич Колопов Бишкек мэриясынын аппаратынын жетекчилигинен бошотулуп, борбордук аппараттагы тармактык саясат башкармалыгынын жетекчиси болуп дайындалды. Бул чечим муниципалитеттин тармактык саясат маселелерин күчөтүү максатында кабыл алынды. Колопов буга чейин да ушул кызматты аркалаган.

Бишкек мэриясынын аппаратынын жаңы жетекчиси болуп Руслан Жайлообекович Сапарбеков дайындалды. Ал буга чейин Нарын облусунда президенттин ыйгарым укуктуу өкүлүнүн биринчи орун басары болуп иштеген.

Ошондой эле, Абдес Сыпарбекович Анарбеков уюштуруу-контроль иштери башкармалыгынын жетекчиси болуп дайындалды. Ал буга чейин «Кыргыз темир жолу» мамлекеттик ишканасында генеральный директордун кеңешчиси болуп иштеген.

Бишкек мэриясынын борбордук аппаратындагы шаарды өнүктүрүү саясаты башкармалыгынын жетекчиси Тимур Бейшенбекович Рыспаев ротация боюнча Октябрь районунун биринчи орун басары болуп дайындалды. Шаарды өнүктүрүү саясаты башкармалыгынын жаңы жетекчиси болуп Давлетбек Орозобекович Туголбаев дайындалды, ал буга чейин жеке компанияда жетекчилик кызматта иштеген.

Мындан тышкары, Бакытберди Нурланбекович Бекбоев өз каалоосу менен кызматынан бошотулду. Бишкек асфальт сервисинин директору болуп Адлет Казакбаевич Казакбаев дайындалды. Ал буга чейин «Кыргыз темир жолу» мамлекеттик ишканасында оңдоо-өндүрүш иштери жана суу камсыздоо башкармалыгынын орун басары болуп иштеген.

Бул өзгөрүүлөр мэриянын ишин жакшыртууга жана эффективдүүлүгүн арттырууга багытталган.