Аман Джумалиев Кыргызстандагы сот отурумдарын онлайн көрсөтүүнүн өнүгүшү тууралуу айтып берди

‹›

Бишкекте онлайн-сот отурумдарын өткөрүү жана кеңейтүү боюнча иштер жүрүп жатат. Жогорку соттун аппарат жетекчисинин орун басары Аман Джумалиев март айында 67 сот отуруму пландалганын, анын 27си түз эфирде көрсөтүлгөнүн билдирди. Ал 40 отурумдун трансляцияланбай калганын, анын себеби тараптардын макулдугу жоктугу жана башка процессуалдык себептер экенин айтты.

Джумалиев онлайн-трансляциялар Жогорку сот менен чектелбестен, Кыргызстандагы башка соттордо да жүргүзүлүп жатканын белгиледи. Бишкектин төрт райондук сотунда, Бишкек шаардык сотунда, өлкөнүн бардык облустарындагы соттордо, ошондой эле Ош, Манас жана Талас шаардык сотторунда сот отурумдары көрсөтүлүүдө. Нарын шаардык сотунда тесттик режимде трансляциялар башталды.

Ал ошондой эле, сот отурумдарын аудио жана видео жазуу системалары менен жабдуу 2016-жылдан бери жүргүзүлүп келе жатканын айтты. Бүгүнкү күндө республика боюнча 72 сотто 157 зал аудио жана видео жазуу системалары менен жабдылган, 99 зал видеоконференция өткөрүү үчүн жабдылган.

Джумалиев 2025-жылдын ноябрь-декабрь айларында бардык категориядагы иштер боюнча сот процесстеринин видеотасмалары тартылганын кошумчалады. Видеоматериалдар интернетте жайгаштырылып, кийинки трансляциялар “Жогорку сот Верховный суд” YouTube каналына жарыяланат.

Сот системасындагы мындай жаңылыктар, коомчулукту сот процессинин ачыктыгы жана жеткиликтүүлүгү менен камсыз кылууга багытталган. Онлайн-трансляциялар сот иштеринин жүрүшүн көзөмөлдөөгө, ошондой эле жарандардын сот системасына болгон ишенимин арттырууга жардам берет.