Кыргызстан биринчи болуп ТМДда 3D технологияларын протездөөдө колдонууда

‹›

Бишкекте, Эмгек, социалдык камсыздандыруу жана миграция министрлигине караштуу протез-ортопедиялык буюмдар боюнча республикалык мекемеде француздук 3D-сканер жана 3D-принтердин тааныштырылышы болду. Бул жабдыктар модернизациялоо алкагында сатып алынган. Келген конокторго 3D-протездөө бөлмөсү, жүрүү мектеби жана жаңы жабдыктардын мүмкүнчүлүктөрү көрсөтүлдү. Жабдыктардын баасы 45 миң 850 евро болуп, республикалык бюджеттен каржыланган. 3D-технологияларын протездөөдө колдонуу ТМД өлкөлөрүндө биринчи жолу ишке ашырылууда.

Мекеме 13 миңден ашык майып адамга кызмат көрсөтөт. Алардын ичинен 1 396 адам төмөнкү буттарга, 443 адам жогорку буттарга протездер менен камсыздалган. 150дөн ашык түрдөгү протез-ортопедиялык буюмдар жеке түрдө даярдалат. Иш-чарага өкмөт башчынын орун басары, эмгек, социалдык камсыздандыруу жана миграция министри, Франциянын Кыргызстандагы элчиси, Кыргызстан профсоюздарынын өкүлдөрү, И. Раззаков атындагы КГТУ жана жабдык өндүрүүчү компаниянын өкүлдөрү, ошондой эле Россия жана Өзбекстандан келген өнөктөштөр катышты.

Өкмөт башчынын орун басары Эдиль Байсалов мекеменин жабдыктары 40 жылдан ашык убакыттан бери жаңыланбаганын белгиледи. “2024-жылга карата министрлер кабинетинин иш-чаралар планына ылайык, материалдык-техникалык базаны модернизациялоого 100 миллион сом каралган. Бүгүн биз улуттук протездөө жана реабилитация системасын өнүктүрүүдө маанилүү кадам жасап жатабыз. 3D-технологияларын киргизүү — бул кызмат көрсөтүүлөрдүн сапатын жаңы деңгээлге көтөрүү. Бул технология ТМД өлкөлөрүндө биринчи жолу колдонулууда. Цифрдык чечимдер жогорку тактыкты, комфортту жана ар бир адамга индивидуалдуу мамилени камсыз кылат”, – деди ал.

Мекеменин маалыматы боюнча, 3D-принтерди колдонуу культеприемниктерди даярдоонун тактыгын жогорулатууга, үлгү алуу процессин кыскартууга жана бейтаптардын реабилитациясын ыңгайлуу кылууга мүмкүндүк берет. Иш-чаранын жүрүшүндө 8-март — Эл аралык аялдар күнүнө карата куттуктоолор айтылып, мекеменин кызматкерлерине алардын кесипкөйлүгү, ишке берилгендиги жана протездөө жана реабилитация системасын өнүктүрүүгө кошкон салымы үчүн ыраазычылык каттары тапшырылды.