Бишкекте Афганистандан аскерлердин чыгарылганына 37 жыл толуусуна арналган митинг-реквием өттү

‹›

Бишкекте, Ата-Тюрк атындагы паркта, советтик аскерлердин Афганистандан чыгарылганына 37 жыл толуусуна арналган митинг-реквием өттү. Бул иш-чарада Бишкек шаарынын мэри Айбек Джунушалиев, Кыргыз Республикасынын коргоо министринин орун басары Алмазбек Кулмурзаев, Россия Федерациясынын Кыргызстандагы элчилигинин коргоо боюнча атташе Игорь Довбня, ардагерлер уюмунун жетекчилери, Афганистанда кызмат өтөгөн аскерлер, коомчулуктун өкүлдөрү жана башкалар катышты.

Иш-чара гүл коюу менен башталды. Митингдин катышуучулары гүлдөрдү коюп, Афганистандагы согуштун миңдеген үй-бүлөлөр үчүн оор сыноо болгонун, ошондой эле анын тарыхта терең из калтырганын белгилешти. Мэр Айбек Джунушалиев жыйындын жүрүшүндө 15-февраль күнүнүн маанисин, эрдикти жана биримдикти баса белгиледи.

“Биз курман болгондордун эрдигине баш ийип, аскердик милдетин ардактуу аткарган ардагерлерге чын жүрөктөн ыраазычылык билдиребиз. Муниципалитет Афганистанда кызмат өтөгөн аскерлерге, жесирлерге жана курман болгондордун үй-бүлөлөрүнө колдоо көрсөтүүнү улантат. Силердин эрдигиңер жана чыдамкайлыгыңар жаш муундар үчүн үлгү жана өлкөбүздүн тарыхында маанилүү бөлүк”, – деди мэр.

Иш-чаранын жүрүшүндө коргоо министринин орун басары Алмазбек Кулмурзаев тарыхый эстен кеткис учурларды сактоонун маанилүүлүгүн белгилеп, ардагерлерге көрсөтүлгөн эрдик жана аскердик милдетке берилгендик үчүн ыраазычылык билдирди. Митинг гүл коюу менен аяктап, интернационалист аскерлерге арналган ыраазычылык сөздөр айтылды.