Дем алыш аймагынан стадионго чейин: Талас шаары кандай жаңыланууда

‹›

Талас шаарын өнүктүрүү үчүн 2024-2026-жылдарга стратегия иштелип чыкты. Учурда шаарда болжол менен 49 миң адам жашайт. Бул документ шаардык чөйрөнү туруктуу, ыңгайлуу жана коопсуз кылууга, ошондой эле калктын жашоо сапатын жакшыртууга багытталган. Стратегияга инфраструктуралык, экономикалык, экологиялык жана социалдык долбоорлор киргизилген.

Талас шаарынын биринчи вице-мэри Айбек Кочорбаев агенттикке билдиргендей, 2024-жылы шаарды өнүктүрүүгө мамлекет тарабынан 1 миллиард 50 миллион сом бөлүнгөн. Бул каражаттар туризм, инфраструктура жана башка багыттардагы долбоорлорго жумшалууда. Кээ бир объектилер пайдаланууга берилсе, калган бөлүгү 2026-жылдын августуна чейин бүткөрүлүп, тапшырылат.

Айбек Кочорбаевдин айтымында, президенттик стабилизациялык фонддон шаарга 1 миллиард 90 миллион сом каралган. “Мурда шаарда ыңгайлуу коомдук транспорт жок болчу. Бул суммадан 180 миллион сом электр автобустарын сатып алууга жумшалат. Облустун жетекчилиги жана мэрия жакында Кытайга барып, 30 автобус сатып алуу боюнча макулдашты. Бөлүнгөн каражаттар жетишсиз болгондуктан, транспорттун бир бөлүгү лизинг аркылуу сатып алынат”, – деди ал.

Өткөн жылы 50 км тротуар асфальтталган. 2026-жылы 36 км шаардык жолдорду оңдоо пландалууда. Алардын 10 кмин Транспорт жана байланыш министрлиги, калган 26 кмин стабилизациялык фонддон 910 миллион сомдун эсебинен аткарат.

Облус үчүн бөлүнгөн 1 миллиард сомдун 240 миллиону Таласка багытталган. Өткөн жылы бул каражаттарга шаардагы борбордук аянт толук реконструкцияланып, 7 км жол асфальтталды. Ошондой эле, шаарда үч завод курулду: асфальт-бетон (33 миллион сом), бетон (19 миллион сом) жана таш майдалоочу (30 миллион сом). Бардык заводдор пайдаланууга берилди.

Туризмди өнүктүрүү максатында борбордук шаардык паркты реконструкциялоо иштери башталды. Бул үчүн 112 миллион сом бөлүнгөн. Парк 5 гектардан ашык аянтты камтыйт. Бул жерде эс алуу зоналары, аттракциондор жана көрктөндүрүү иштери жүргүзүлүүдө. Эски аттракциондор 2008-жылдан бери иштебей калган, жаңы 8 аттракцион Кытайдан алынып келинди.

Шаарда жаңы бала бакча, мектептер, стадион жана башка социалдык объектилер курулууда. Мисалы, “Алтын балалык” бала бакчасы 280 орунга ылайыкташтырылып, 220 миллион сомго курулууда. Ошондой эле, футбол стадиону 5500 орунга ылайыкташтырылып, ачылышы Туруктуу күнгө пландалууда.

Айбек Кочорбаев бардык долбоорлорду убагында аяктоого аракет кылып жатышканын белгилеп, Талас облусунда Туруктуу күндү жогорку деңгээлде өткөрүү үчүн активдүү даярдык көрүлүп жатканын айтты.