«Тазалыктын жумушунун көлөмү бир жылда 325 миллион сомго өстү»

‹›

Бишкек шаарында 2025-жылы «Тазалык» муниципалдык ишканасы тарабынан аткарылган иштердин жалпы көлөмү 1,37 миллиард сомду түздү. Бул 2024-жылга салыштырмалуу 325,6 миллион сомго көп. Бишкек шаарынын биринчи вице-мэри Мирланбек Байгончоковдун маалыматы боюнча, шаардагы санитардык тазалоо аянты 11,1 миллион квадрат метрге жеткен. Бул багытта 1,21 миллиард сомдук иштер аткарылып, 321,5 миллион сомго өсүш болгон.

Тиричилик калдыктарын чыгаруу боюнча абоненттердин саны 1,04 миллионго жетип, кирешелер 913,9 миллион сомду түздү. Бул пландагы 804,8 миллион сомдон 113,6% аткарылгандыгын көрсөтөт. 2025-жылы шаарда 18 755 дарак жана кустарник отургузулуп, бул өткөн жылга салыштырмалуу 7 966 даанага көп. Ошондой эле 1 586 001 бир жылдык гүл, 8 210 роза жана 229 380 тюльпан луковицасы отургузулган.

Аламедин жана Ала-Арча дарыяларынын жээгин тазалоо иштеринде 107 миң тоннадан ашык таштандылар чыгарылган. Чортекова жана Жайыл Баатыра көчөлөрүнүн кесилишиндеги «Правительственный» сквери да көрктөндүрүлүп, 8 гектар аянтка сугат скважинасы курулган.

«Бишкексвет» ишканасы 2025-жылы шаардык жарыктандыруу системасын өнүктүрүү боюнча чоң иштерди жүргүздү. 1 161 лампа алмаштырылып, 280 чакырымдан ашык өзүнчө изоляцияланган зымдар тартылды. 18 571 LED жарык орнотулуп, 1 329 жарык опорасы коюлду, бул шаардагы көчө жарыктандыруунун сапатын жана ишенимдүүлүгүн жогорулатууга мүмкүндүк берди.

Мындан тышкары, муниципалдык лифттерди жаңылоо программасынын алкагында 2025-жылы 100 лифтти жеткирүү жана орнотуу боюнча келишимдер түзүлгөн. 36 объектте алмаштыруу иштери аякталды. Суу менен камсыздоо жана суу чыгаруу тармагында 354,0 миллион сомдук иштер аткарылып, 1,41 чакырым канализациялык тармактар реконструкцияланды. 18,9 чакырым суу түтүктөрү курулуп, алмаштырылды.

Байгончоков белгилегендей, стратегиялык маанидеги долбоорлор да улантылды. «Башкара-Суу» суу алуу жайы кеңейтилип, пайдаланууга берилди. «Орто-Алыш» суу алуу жайын күчөтүү боюнча иштер уланууда. Шаардын түштүк аймагында 48,5 миллион сомдук локалдык суу алуу жайы курулду. «ХБО» суу алуу жайы 113,0 миллион сомго модернизацияланды, учурда объект пайдаланууга даярдалууда.

Бүгүн Бишкек шаардык мэриясынын коллегиясынын жыйыны болуп өттү. Жыйынга Кыргыз Республикасынын президентинин администрациясынын жетекчиси Адылбек Касымалиев төрагалык кылды. Жыйында 2025-жылдагы Бишкек шаарынын социалдык-экономикалык өнүгүүсүнүн жыйынтыктары жана 2026-жылга пландар талкууланды.