Кыргызстанда 220 мектепти окуу-лабораториялык жабдуулар жана маалыматтык-коммуникациялык технологиялар менен камсыз кылышты

‹›

Кыргызстанда кластердик мектептер заманбап окуу-лабораториялык жабдуулар менен камсыздалды. Бул жабдуулар STEM-класстар үчүн арналган жана практикалык, санариптик билим берүүнү ишке ашырууга мүмкүндүк берет. Билим берүү министрлигинин маалыматына ылайык, окуу-лабораториялык жабдуулар «Алтын казык» мамлекеттик программасынын алкагында жеткирилген. Бул программа өлкөдөгү билим берүү системасын трансформациялоого, заманбап билим берүү технологияларын киргизүүгө жана STEM дисциплиналарын күчөтүүгө багытталган.

Лабораториялык жабдуулар ар түрдүүлүгү менен айырмаланат жана кеңири окуу тапшырмаларын камтыйт. Ар бир мектеп 25 комплект лабораториялык жабдууларды алды, алар мектептик жана изилдөө лабораториялык иштерди жүргүзүүгө арналган. Жалпысынан 220 кластердик мектепке 5 500 комплект жабдуулар, 220 интерактивдүү панелдер жана ошондой эле 220 ноутбук жеткирилди.

Бул комплекттер механика, электр, магниттик мыйзамдарды, оптикалык көрүнүштөрдү, толкун процессин, суюктук касиеттерин, химиялык реакцияларды жана биологиялык объектилерди изилдөө үчүн лабораториялык иштерди жүргүзүүгө мүмкүндүк берет. Жабдуулар так өлчөмдөрдү жүргүзүүгө, эксперименттик маалыматтарды жазып алууга жана талдоого, ошондой эле окуучулардын илимий изилдөө жана заманбап өлчөө технологиялары менен иштөө көндүмдөрүн калыптандырууга жардам берет.

Интерактивдүү панелдер жана күчтүү ноутбуктар лабораториялык иштерди башкаруу, эксперименттердин натыйжаларын реалдуу убакыт режиминде көрсөтүү, санариптик моделдерди жана симуляцияларды демонстрациялоо, ошондой эле окуучулардын долбоордук жана изилдөө ишмердүүлүгүн маалыматтарды иштеп чыгуу, сактоо жана көрсөтүү үчүн колдонулат.

Бул жабдууларды колдонуу окуучулардын предметтик билимдерин, практикалык көндүмдөрүн, санариптик сабаттуулугун жана изилдөөчү ой жүгүртүүсүн өнүктүрүүгө, ошондой эле табигый илимдер боюнча предметтерди окутуунун сапатын жогорулатууга жардам берет. Мектептердин мугалимдери үчүн окуу-лабораториялык жана ИКТ жабдууларын эффективдүү пайдалануу боюнча тиешелүү окуу иш-чаралары өткөрүлдү.

Министрликтен билдиришкендей, бул 220 мектеп 53 инновациялык мектептин кластердик мектептери болуп саналат. Алар жаңы билим берүү стандарттарын пилоттук тестирлөө, билим берүү процессине заманбап технологияларды киргизүү жана мугалимдердин квалификациясын жогорулатуу үчүн региондордо эксперименттик аянтчалар катары кызмат кылат.