Араван районунда 65 миллион долларга күн станциясы курулат

‹›

Сары-Таш айылында, Ош облусунун Араван районунда, 200 гектар жерге 105 МВт кубаттуулуктагы күн электр станциясы курулат. Ош облусунун жетекчиси Аманкан Кенжебаев бүгүн Араван районундагы жумушчу сапары учурунда жер тилкеси менен таанышып, адистерден маалымат алды.

Бул долбоор чет элдик инвесторлордун каржылоосу менен ишке ашырылат. Жалпы долбоордун баасы 65 миллион долларды түзөт. Алгачкы этапы жазында башталат, анда 15 МВттан ашык кубаттуулуктагы күн панелдери орнотулат. Экинчи этапта курулуш толугу менен аякталат жана жалпы кубаттуулук 105 МВтга жетет. Жалпы 450 миң күн панелин орнотуу пландалууда.

Ошондой эле, 35 жергиликтүү тургундун туруктуу жумуш орундары менен камсыз болору күтүлүүдө. Облус жетекчиси инвесторлордун демилгесин колдоп, долбоорду ишке ашырууда бардык тараптан жардам көрсөтүлөрүн белгиледи.

Күн энергиясы экологиялык жактан таза жана жаңылануучу энергия булагы болуп саналат, бул долбоор өлкөнүн энергетикалык коопсуздугун камсыздоого жана жергиликтүү экономикага оң таасир этүүгө жардам берет.