Айыл Банк кичи жана орто ишкердик субъекттерин жеңилдетилген насыялоо программасын баштады

‹›

Айыл Банк жаңы программа ишке киргизип, Кыргызстандын чакан жана орто бизнес өкүлдөрүнө жеңилдетилген кредит берүү мүмкүнчүлүгүн сунуштады. Бул демилге мамлекеттин бизнеске колдоо көрсөтүү, ишкерлердин узак мөөнөттүү жана туруктуу финансылык ресурстарга жеткиликтүүлүгүн арттыруу, инвестициялык активдүүлүктү жогорулатуу жана жумуш орундарын түзүү жана сактоо максатында ишке ашырылууда.

Программа жеке ишкерлерге жана юридикалык жактарга, экономикадагы артыкчылыктуу тармактарда иш алып барган, анын ичинде тамак-аш өндүрүшү, тигүү жана текстиль өнөр жайы, туризм, билим берүү, саламаттык сактоо, IT, инновациялар, стартаптар, кол өнөрчүлүк жана кызмат көрсөтүү тармактарына багытталган.

Кредиттер өндүрүштүк жабдууларды жана техникаларды сатып алууга, өндүрүштүк максаттагы транспорт каражаттарын сатып алууга, ошондой эле иштеп жаткан бизнесин кеңейтүүгө жана модернизациялоого жумшалат. Кредиттер улуттук валюта — сом менен 6% жылдык үстөк менен берилет (эффективдүү пайыздык ставка 6,16% дан башталат) жана 60 айга чейин берилет. Максималдуу финансылык сумма 50 миллион сомго чейин жетет жана ал кредиттин максатына жана карыз алуучунун категориясына жараша аныкталат.

Бул программа ишкердикти өнүктүрүүгө, заманбап технологияларды киргизүүгө жана Кыргызстандын экономикасынын туруктуу өсүшүнө көмөктөшөт.