2026-жылы айыл чарба комплексине 40 миллиард сомдон ашык каражат бөлүндү

Кыргыз Республикасынын агропромышлендык комплекси үчүн 2026-жылы 40 миллиард сомдон ашык каражат бөлүнөт. Бул тууралуу суу ресурстары, айыл чарба жана кайра иштетүү өнөр жайы министри Бакыт Торобаев Жогорку Кеңеште өткөн жыйында билдирди.

Министрдин айтымында, жазгы талаа иштерин убагында жана сапаттуу жүргүзүү, ошондой эле фермерлерди колдоо максатында өкмөт мамлекеттик долбоорлорду жана инвестициялык программаларды ишке ашырууда.

2026-жылга республикалык бюджеттен 6 миллиард сом, атайын эсептен 1,5 миллиард сом, мамлекеттик инвестициялык долбоорлордон 11 миллиард сом, капиталдык салымдардан 14,3 миллиард сом, ошондой эле 7 мамлекеттик колдоо программасынан 9,3 миллиард сом бөлүнгөн.

Агроөнөржай тармагы өлкөнүн экономикасында маанилүү роль ойнойт, андыктан бул каражаттар айыл чарба өндүрүшүн жогорулатууга, фермерлердин шарттарын жакшыртууга жана азык-түлүк коопсуздугун камсыздоого багытталат.