Жогорку Кеңештин спикери Кыргызстан менен Түркиянын ортосундагы визасыз режимдин мөөнөтүн узартууну сунуштады

‹›

Бишкек шаарында Жогорку Кенештин спикери Нурланбек Тургунбек уулу Түркия Республикасына расмий сапар менен барып, Түркиянын Улуу улуттук жыйынынын төрагасы Нуман Куртулмуш менен жолугушту. Жолугушууда эки өлкөнүн саясий, экономикалык жана маданий-гуманитардык байланыштарын бекемдөө маселелери талкууланды.

Тургунбек уулу, 2024-жылы Түркиянын президенти Реджеп Тайип Эрдогандын Кыргызстанга болгон мамлекеттик сапары тарыхый окуя болгонун, бул сапар стратегиялык өнөктөштүктүн жаңы барагын ачканын белгиледи. Ал ошондой эле, Садыр Жапаров менен Реджеп Тайип Эрдоган ортосундагы жакын достук мамилелердин кызматташтыкты өнүктүрүү үчүн бекем негиз түзөрүн айтты.

Спикер, парламенттер аралык диалогду кеңейтүү жана достук топтордун деңгээлинде байланыштарды улантуу зарылдыгын да белгиледи. Жолугушууда, эки өлкөнүн товар жүгүртүүсүн 5 миллиард долларга жеткирүү максатын эске салып, түрк ишкерлерин энергетика, кен казуу жана өнөр жай сыяктуу артыкчылыктуу тармактарга инвестиция салууга чакырды.

Ошондой эле, Тургунбек уулу, эки элдин ортосундагы визасыз режимди 90 күндөн 180 күнгө узартуу боюнча сунушун билдирди. Бул жылы Кыргызстан VI Дүйнөлүк көчмөндөр оюндарына Түркиянын спортчуларын жана расмий өкүлдөрүн күтүп жатканын айтты.

Билим берүү тармагындагы кызматташтыкты да талкуулап, Кыргызстан менен Түркиянын бул жааттагы өнөктөштүгү башка мамлекеттер үчүн үлгү экенин белгиледи. Ал “Манас” университетин мисал келтирип, бул окуу жайынын жакынкы келечекте дүйнөдөгү 500 мыкты университеттин катарына кирет деген ишенимин билдирди.

Куртулмуш болсо, Түркия кыргыз эли менен бардык багыттарда кызматташууга кызыкдар экенин айтты. Ал, саламаттык сактоо жана билим берүү тармактарындагы кызматташтыкты өнүктүрүү приоритеттүү милдеттердин бири экенин белгилеп, бул багыттарда бир катар биргелешкен долбоорлор ишке ашырылып жатканын кошумчалады.