Ошто 2026-жылдын сентябрына чейин 10 жаңы мектеп курулат

‹›

Ош шаардык мэриясы

Ош шаарында жаңы билим берүү мекемелерин куруу боюнча мэр Женишбек Токторбаевдин жана курулуш, архитектура жана ЖКК министри Нурдан Орунтаевдин жетекчилиги астында жыйын өттү. Жыйындын жүрүшүндө 2026-жылы куруу пландалган 10 мектептин долбоорлору талкууланды.

Мэриядан алынган маалыматка ылайык, жыйындын катышуучулары жер тилкелерин бөлүп берүү, инфраструктураны камсыздоо, долбоордук-сметалык документациянын тактыгы жана жумуш графиктеринин так сакталышы боюнча маселелерди карашты. Жыйындан кийин мэр жана министр курулуш жүргүзүлө турган аймактарды жеринен көрүп чыгышты. Жаңы мектептер заманбап стандарттарга жооп бериши, сапаттуу материалдардан курулушу жана жумуш процессинин ачык жана жоопкерчиликтүү болушу зарылдыгы белгиленди.

Ошондой эле, президент Садыр Жапаровдун демилгеси менен республикалык бюджеттин эсебинен курулуш иштери жүргүзүлүп жатканы маалымдалды. Мындан тышкары, С. Жигитов атындагы (мурунку К. Маркса) жана М. Ломоносов атындагы эски мектептер толугу менен бузулуп, алардын ордуна жаңы заманбап имараттар курулат. “Бардык 10 мектеп 2026-жылдын сентябрына чейин пайдаланууга берилет”, – деп айтылат маалыматта.

Билим берүү мекемелеринин курулушу өлкөнүн билим берүү системасын жакшыртууга жана жаш муундарга заманбап билим берүүгө багытталган маанилүү кадам болуп саналат. Жаңы мектептердин курулушу, ошондой эле, жергиликтүү коомчулуктун муктаждыктарын эске алуу менен жүргүзүлөт.