Америкалык IT-гиганттын акциялары ИИ чыгымдарынан улам төмөндөдү

‹›

Бишкек. Америкалык технологиялык гигант Amazon компаниясынын акциялары кварталдык отчеттору жарыялангандан кийин кескин төмөндөдү. 5-февралда NASDAQ биржасында кечки соода учурунда компаниянын акциялары 10% чейин төмөндөгөн, бирок негизги сессиянын жабылышына карата төмөндөө 4,4% га чейин кыскарган.

Компаниянын финансылык көрсөткүчтөрү рыноктун күтүүлөрүнө ылайык болду. Amazonдун кирешеси 14% га өсүп, 213,4 миллиард долларга жетти, ал эми таза кирешеси 21,2 миллиард долларды түздү.

Акцияларга басым жасаган негизги фактор – жасалма интеллектке чоң инвестицияларды салуу пландары. Бул чиптерди сатып алуу, жабдууларды алуу жана маалыматтарды иштетүү борборлорун куруу боюнча пландарды камтыйт. Инвесторлор мындай чоң чыгымдардын өзүн актабай калышы жана узак мөөнөттүү келечекте күтүлгөн кирешени камсыз кылбай калышы мүмкүн деп кооптонушууда.

Компаниянын пландары боюнча, 2026-жылы жалпы инвестициялардын көлөмү болжол менен 200 миллиард долларды түзүшү мүмкүн. Бул каражаттын бир бөлүгү SpaceX компаниясынын Starlink системасына атаандаш спутниктерди чыгарууга жумшалат, бирок негизги инвестициялар жасалма интеллект долбоорлоруна багытталат.

Amazonдун башкы директору Энди Джесси аналитиктер менен болгон сүйлөшүүдө компаниянын жасалма интеллектке активдүү инвестиция салууну улантууну пландап жатканын билдирди. Бирок инвесторлордун реакциясы тескери болду: рынокто жасалма интеллектке болгон инвестициянын чоң гонкасы жетиштүү киреше алып келери боюнча күмөн саноолор күчөдү.

Мурда Microsoft жана Alphabet сыяктуу башка технологиялык гиганттарда да ушундай эле кырдаал байкалган. Жасалма интеллектке болгон чыгымдардын өсүшү тууралуу отчеттордон кийин, Microsoftтун акцияларынын төмөндөшү компаниянын тарыхындагы эң чоң төмөндөөлөрдүн бири болду.