Жогорку Кеңеште турак жайдын жогорку ижара акысы боюнча маселе көтөрүлдү

‹›

Бишкекте депутат Суйунбек Омурзаков Жогорку Кенештин жыйынында турак жайдын ижара акысынын жогору экенин белгиледи. Ал республика боюнча курулуш иштеринин активдүү жүрүп жатканын, бирок ижара бааларынын жогору бойдон калып жатканын айтты. “Жаш үй-бүлөлөргө жана аз кирешелүү үй-бүлөлөргө турак жай ижарага алуу кыйын болуп жатат. Көршү өлкөлөр менен салыштырганда, бизде ижара баалары жогору. Бааларды кандайча жөнгө саласыз?” – деп сурады депутат.

Премьер-министрдин биринчи орун басары Данияр Амангельдиев мамлекеттик ипотекалык компанияда ислам принциптерине негизделген финансылык программа ишке ашырылып жатканын билдирди. Анын айтымында, долбоордун алкагында курулган турак жайды ижарага берип, кийин сатып алуу пландалууда. Тиешелүү мыйзам долбоору парламент тарабынан ратификацияланган.

“Ислам фондусу менен 200 миллион доллар өлчөмүндө финансылык жардам алуу боюнча макулдашууга жетишилди. Азыр фонд каражаттарды 400 миллион долларга чейин көбөйтүүгө даяр. Биз бул ресурстарды тартууга даярбыз, анткени долбоордун пайдасы чоң болот деп эсептейбиз,” – деди Амангельдиев.

Турак жай маселеси өлкөдө маанилүү көйгөйлөрдүн бири болуп саналат. Жаштардын жана аз камсыз болгон үй-бүлөлөрдүн турак жайга жеткиликтүүлүгүн камсыз кылуу үчүн мамлекеттик программалардын ишке ашырылышы зарыл. Ижара акыларынын жогору болушу, өзгөчө жаш үй-бүлөлөр үчүн, социалдык көйгөйлөрдү жаратууда. Ошондуктан, бул багытта иш алып баруу жана жаңы чечимдерди табуу маанилүү.