Шекерден этке чейин: алты жылда Кыргызстан азык-түлүк көз карандысыздыгын бекемдеди

‹›

Кыргызстанда акыркы жылдары азык-түлүк импортуна болгон көз карандычылык азайып, негизги азык-түлүк өндүрүшү туруктуу өсүүдө. Мындан улам, өлкөнүн өзүн-өзү камсыздоо деңгээли бир катар азык-түлүк түрлөрү боюнча кыйла жогорулады.

2025-жылы өлкө алты негизги азык-түлүк түрү боюнча өзүн-өзү камсыздоого жетишти. Бул азыктарга жашылчалар, картошка, сүт, эт, кант жана жумуртка кирет. Бирок, нан азыктары, өсүмдүк майы, мөмө-жемиштер жана жимиштер боюнча импортко көз карандычылык сакталууда.

Соңку алты жылда азык-түлүк боюнча өзүн-өзү камсыздоо көрсөткүчтөрү кыйла жакшырды. Мисалы, сүт боюнча 2020-жылы 112%дан 2025-жылы 127,3%га, эт боюнча 63,6%дан 85,7%га, кант боюнча 15%дан 82,1%га, жумуртка боюнча 56,4%дан 79,8%га, өсүмдүк майы боюнча 34%дан 51,7%га, мөмө-жемиштер боюнча 15%дан 51,4%га чейин жогорулады.

Агроөнөр жай министрлиги ички өндүрүштү жана айыл чарба продукциясын кайра иштетүүнү күчөтүү өлкөнүн агрардык саясатынын жана азык-түлүк коопсуздугунун негизги багыттарынын бири экенин белгилейт. Бул багытта иш алып баруу өлкөнүн азык-түлүк коопсуздугун камсыздоого чоң салым кошот.