ЕАЭСте какао майын импорттоого тарифтик жеңилдик киргизилди

‹›

Евразия экономикалык комиссиясы импорттолуучу какао майына тарифтик жеңилдик берүү чечимин кабыл алды. Бул тууралуу Кыргызстандын айыл чарба министрлиги маалымдады.

Жаңы чечимге ылайык, какао майы үчүн, ТН ВЭД ЕАЭС кодунун 1804000000 боюнча, жылына 300 тоннага чейин киргизүү бажы төлөмүнөн бошотуу каралган. Тарифтик жеңилдик жыл сайын колдонулуп, 2027-жылдын 30-апрелине чейин узартылат.

Бул чара ЕАЭСке мүчө мамлекеттердин кондитердик жана тамак-аш өнөр жайын колдоо, ички өндүрүштү өнүктүрүү жана Союздун аймагында кошумча баа түзүү максатында иштелип чыккан. Жеңилдикти алуу үчүн, ЕАЭСке мүчө мамлекеттин ыйгарым укуктуу органы тарабынан берилген тастыктоочу документ болушу керек. Документте импорттоочу уюмдар жана белгиленген лимиттин алкагында киргизүүгө уруксат берилген какао майынын көлөмү көрсөтүлүшү зарыл.

Импорттолгон какао майы тек гана тиешелүү мамлекеттин аймагында кайра иштетүү жана даяр продукция өндүрүү үчүн колдонулушу керек. Башка максаттарда колдонууга тыюу салынат. Бул талап жергиликтүү өндүрүштү стимулдаштырып, Союздун ичинде чыгарылган продукциянын атаандаштыкка жөндөмдүүлүгүн жогорулатууга багытталган.

Какао майы – кондитердик өнөр жайында кеңири колдонулган сырьё, ал шоколад, кондитердик буюмдар жана башка тамак-аш продукцияларын өндүрүүдө маанилүү роль ойнойт. Ошондуктан, бул жеңилдик өлкөнүн экономикасына оң таасирин тийгизип, жергиликтүү өндүрүштү колдоого жардам берет.