ЕАЭБде айыл чарба долбоорлорун каржылоонун механизми ишке кирет

‹›

Евразия экономикалык комиссиясы айыл чарба өнөр жайындагы биргелешкен кооперативдик долбоорлорго финансылык колдоо көрсөтүү механизмин ишке киргизүүнү жактырды. Бул тууралуу Кыргызстандын айыл чарба министрлиги маалымдады.

Мурда мындай колдоо негизинен өнөр жай тармагында колдонулуп келген. Эми айыл чарба секторуна да бул механизмдин киргизилиши, ЕАЭБге мүчө мамлекеттер ортосундагы кооперацияны өнүктүрүүгө жаңы мүмкүнчүлүктөрдү түзөт.

Жаңы чара импортту алмаштырууну, айыл чарба продукциясын кайра иштетүүнү өнүктүрүүгө жана ЕАЭБге мүчө мамлекеттердин, анын ичинде Кыргызстандын, экспорттук потенциалын жогорулатууга багытталган.

Финансылык колдоо кооперативдик долбоорлорду ишке ашырууга жардам берип, айыл чарба тармагындагы өндүрүштүк чынжырларды бекемдөөгө, мамлекеттер аралык кызматташтыкты кеңейтүүгө жана жогорку кошумча наркы бар атаандаштыкка жөндөмдүү продукцияны чыгарууга өбөлгө түзөт.

Мындай колдоо механизмдери айыл чарба тармагында жаңы мүмкүнчүлүктөрдү ачып, өлкөнүн экономикасын бекемдөөгө жардам берет.