Кыргызстан Европага балды экспорттоого даярдык көрүүдө

‹›

Кыргызстанга Европалык Союзга бал экспорттоо укугу берилди. Аталган маалыматты айыл чарба министрлиги таратты. Министрликтин өкүлдөрү, ветеринардык кызматтын жетекчиси Адилет Сотовалдиев баштаган адистер, республика боюнча бал өндүрүүчүлөр менен жолугушуу өткөрүштү.

Жолугушууда экспортту өнүктүрүү боюнча пландар, кыргыз балын европалык базарда таанытуу жана продукциянын эл аралык сапат стандарттарына жооп берүүсүн камсыз кылуу маселелери талкууланды. Европалык комиссия кыргыз балын экспорттоого уруксат берип, аны импорттоого коюлган техникалык талаптардын тизмесине киргизди.

Европа базарынын ачылышы ветеринардык кызматтын системалуу ишинин натыйжасында мүмкүн болду. Бул иш-аракеттер айыл чарба жана кайра иштетүү өнөр жайы министрлиги менен Европалык Союздун өнөктөштөрүнүн кызматташтыгынын негизинде жүргүзүлдү.

Бул чечим жергиликтүү бал өндүрүүчүлөр үчүн жаңы мүмкүнчүлүктөрдү ачат. Экспорттун көлөмү көбөйүп, продукциянын эл аралык базарда атаандаштыкка жөндөмдүүлүгү жогорулайт. Ошондой эле, жаңы базарларга чыгуу үчүн шарттар түзүлөт.

Эл аралык стандарттарга жооп берген мал чарба продукциясынын экспорттук тизмесин кеңейтүү боюнча иштер улантылат, бул кыргыз өндүрүүчүлөрүнүн европалык базарда позицияларын бекемдөөгө жардам берет.