Караколдо ломбарддардын ишинде мыйзам бузуулар аныкталды

‹›

Кыргыз Республикасынын Улуттук коопсуздук мамлекеттик комитети Каракол шаарындагы ломбарддардын ишмердүүлүгүн текшерди. Бул чаралар өкмөттүн орун басары, ГКНБнын төрагасы Камчыбек Ташиевдин көрсөтмөсүнө ылайык жүргүзүлдү.

Текшерүү учурунда айрым ломбарддардын “Ломбарддардын ишмердүүлүгү жөнүндө” мыйзамын жана өкмөттүн 2017-жылдын 8-июлундагы №353 токтому менен бекитилген минималдуу талаптарды бузганы аныкталды. Мисалы, ломбарддар залог катары мыйзамдуу түрдө кабыл алынбаган документтерди, анын ичинде жарандык паспортторду, туулгандыгы тууралуу күбөлүктөрдү, жеке менчик укугуна байланыштуу мамлекеттик актыларды жана башка документтерди кабыл алышкан.

Текшерүүнүн жыйынтыгы боюнча 16 ломбарддын иши токтотулуп, калган ломбарддар боюнча текшерүү иштери улантылууда. Ошондой эле, ломбарддардын ээлери жана кызматкерлери менен пайыздык ставкаларды жогорулатпоо жана Кыргыз Республикасынын “Карыз берүүчүлүк ишмердүүлүгүн чектөө” мыйзамына ылайык, пайыздык ставка 30% дан ашпашы керектиги боюнча түшүндүрүү иштери жүргүзүлдү.

ГКНБ жарандарды сак болууга, насыяларды жана мүлккө байланыштуу келишимдерди түзүүдө документтерди кылдаттык менен карап чыгууга чакырды. Эгерде ломбарддардын кызматкерлеринен алдамчылык же башка мыйзамсыз аракеттер болсо, анын ичинде залогго коюлган мүлктү күч менен алып коюу боюнча, Иссык-Куль облусунун ГКНБ башкармалыгына (03922) 5-11-80 телефону аркылуу кайрылуу сунушталат.