Агроөнөр жайда гидропониканы активдүү киргизүү

‹›

Кыргызстанда айыл чарбасын өнүктүрүүнүн заманбап ыкмаларынын бири – гидропондук технология активдүү колдонулууда. Бул тууралуу Суу ресурстары, айыл чарба жана кайра иштетүү өнөр жайы министрлиги маалымдады. Гидропоника ыкмасы жерди колдонбостон, өсүмдүктөрдү сууну пайдаланып, зарыл азык заттар менен байытып өстүрүүгө мүмкүндүк берет.

Гидропониканын негизги артыкчылыгы – суунун чоң үнөмдөлүшү жана жогорку түшүмдүүлүк. Адистердин пикири боюнча, бул технология салттуу айыл чарба ыкмаларына салыштырмалуу сууну 70-90% га аз пайдаланууга мүмкүндүк берет жана өсүмдүктөрдүн өсүшүн тездетет. Мындан тышкары, гидропоника ыкмасы менен өстүрүлгөн жашылчалар экологиялык жактан таза болуп, жыл бою өндүрүлүшү мүмкүн. Бул шаардык шарттарда, чектелген аянттарда жана жабык жайларда айыл чарбасын жүргүзүүгө кеңири мүмкүнчүлүктөрдү ачат.

Гидропоника – бул келечектин технологиясы. Ал азык-түлүк коопсуздугун камсыз кылууга жана ресурстарды рационалдуу пайдаланууга чоң салым кошот, – деп белгиледи долбоордун өкүлү. Бул демилге айыл чарба секторунда инновацияларды колдоого, жаш ишкерлерди тартууга жана жергиликтүү рынокту сапаттуу айыл чарба продукциясы менен камсыз кылууга багытталган.