Ошто Даун синдрому бар балдар үчүн жаңы борбор ачылды

‹›

Ош шаарында Дауна синдромуна ээ балдар үчүн жаңы борбор ачылды.

Ош шаарында көп функционалдуу күндүзкү ресурс борбору расмий түрдө ишке кирди. Бул борбор «Сантерра-Юг» коомдук кайрымдуулук фонду тарабынан Дауна синдромуна ээ балдардын социалдык адаптациясын колдоо, коомго интеграциялоо жана ата-энелерге ар тараптуу жардам көрсөтүү максатында түзүлгөн.

Шаар мэри Женишбек Токторбаев ачылыш аземине катышып, борбордун иши менен таанышып, балдар жана алардын ата-энелери менен баарлашты. Мэр өз сөзүндө мындай социалдык долбоорлордун маанилүүлүгүн белгилеп, атайын муктаждыктары бар балдарды колдоо, алардын толук өнүгүшү үчүн шарттарды түзүү жана тең укуктарды камсыздоо Ош шаардык мэриясынын социалдык саясатынын негизги багыттарынын бири экенин айтты.

Учурда «Сантерра-Юг» фондунда Кыргызстандын түштүк аймагынан 300дөн ашык үй-бүлө катталган, алардын 70и Ош шаарынан. Ресурс борборунун иши балдардын өз алдынча жашоо жөндөмдөрүн өнүктүрүүгө, ата-энелерге социалдык, психологиялык жана маалыматтык жардам көрсөтүүгө багытталган.

Мындай борборлордун ачылышы коомдогу инклюзияны жогорулатууга, балдардын мүмкүнчүлүктөрүн кеңейтүүгө жана ата-энелердин колдоосун күчөтүүгө жардам берет.