Кыргызстанда мүмкүнчүлүгү чектелген адамдар үчүн медициналык жабдуулар берилди

‹›

Бишкекте 26-январда Кыргызстандын Эмгек, социалдык камсыздоо жана миграция министрлиги менен Good Neighbors International уюмунун филиалы ортосундагы кызматташтык меморандумунун алкагында атайын медициналык жабдууларды тапшыруу аземи өттү. Бул жабдуулар Беловодск балдар социалдык стационардык мекемесине жана Сокулук реабилитациялык борборуна берилди.

Министрликтин маалыматына ылайык, берилген жабдуулар арасында медициналык кушетка, 3 лампадан турган жылжымалуу нурландыруучу аппарат, эки дат баспас темирден жасалган полкалары бар инструменттер үчүн стол, электр кресло-коляскалар, дары-дармек жана керектүү материалдар үчүн шкаф, велотренажер, массаж креслосу, ДЦП менен жабыркаган балдар үчүн вертикализатор, стоматологиялык автоклав, ДЦПнын ар кандай формалары менен жабыркаган балдар үчүн ортопеддик стул жана ИМ-01 иглоотсекатель бар.

Аземде Кыргызстандын Эмгек, социалдык камсыздоо жана миграция министринин орун басары Айнура Орозбаева жана Good Neighbors International уюмунун Кыргызстандагы директору Чо Сунхёнг катышты. Орозбаева, берилген жабдуулар балдардын ден соолугу, өнүгүүсү жана келечеги үчүн маанилүү инвестиция экенин белгилеп, бул жабдуулар реабилитациялык кызматтардын жеткиликтүүлүгүн жана сапатын жогорулатууга жардам берерин айтты.

Чо Сунхёнг, уюмдун бул колдоосу мүмкүнчүлүгү чектелген адамдардын укуктарын илгерилетүүгө, социалдык биримдикти бекемдөөгө жана инклюзивдүү коомду өнүктүрүүгө болгон берилгендигин көрсөтөт деп белгиледи. Берилген жабдуулар реабилитациялык жана медициналык кызматтардын сапатын жогорулатууга, ошондой эле балдар менен мүмкүнчүлүгү чектелген адамдар үчүн ыңгайлуу жана коопсуз шарттарды түзүүгө багытталган.