КРда бир жумада 79 миңге жакын айдоочулук күбөлөлөрдү алмаштыруу үчүн арыздар катталды

‹›

Бишкекте президенттин иш башкаруучусу Каныбек Туманбаев «Унаа» мамлекеттик мекемесинде пландалбаган текшерүү өткөрдү. Текшерүүнүн жүрүшүндө автоунааларды каттоо жана кайра каттоо, айдоочулук күбөлүктөрдү берүү жана алмаштыруу, жарандарга кызмат көрсөтүү, ошондой эле коопсуздук талаптарына ылайык келүү боюнча мониторинг жүргүзүлдү.

Туманбаев эски мөөнөтсүз айдоочулук күбөлүктөрүндө 20-30 жыл мурунку сүрөттөрдүн колдонулуп жатканын белгиледи. Бул жеке адамдарды так аныктоону кыйындатат. Мындан тышкары, мындай документтерде коргоо элементтери жетишсиз, ал эми аларды жасалмалоо оңой, бул коопсуздукка түздөн-түз коркунуч туудурат. Эски айдоочулук күбөлүктөрү чет өлкөлөрдө мыйзамдуу документ катары таанылбайт, башкача айтканда, алар эл аралык деңгээлде легалдашкан эмес.

Ошондуктан, мамлекетте катуу тартипти сактоо жана документтерди заманбап талаптарга ылайык келтирүү зарылдыгы белгиленди. Президенттин иш башкаруучусу айдоочулук күбөлүктөрүн берүү жана автоунааларды каттоо жаатында санариптештирүүнү өнүктүрүү, санариптик кызматтарды кеңейтүү жана маалыматтарды толук жаңылоону тапшырды.

Мекеменин маалыматына ылайык, 2026-жылдын 15-21-январь аралыгында мөөнөтсүз айдоочулук күбөлүктөрүн алмаштыруу боюнча 78 миң 959 арыз кабыл алынган. Анын ичинен онлайн форматта 46 миң 431, офлайн форматта 32 миң 528 арыз берилген. Бул жарандардын бул маселеге болгон жогорку кызыгуусун жана кызматтарга болгон чоң суроо-талапты көрсөтөт.

Текшерүүнүн жыйынтыгы боюнча мамлекеттик кызматтарды көрсөтүүдө тартипти күчөтүү, коопсуздукту камсыз кылуу жана санарип чечимдерди системалуу түрдө киргизүү зарылдыгы белгиленди.