Maalymat.kg сайтында жарыяланган материалдар жеке колдонуу үчүн гана арналган.
© 2024 - Иштеп чыккан Aura
2026-жылы кыргыз анимациясын өнүктүрүүгө 50 миллион сом бөлүнөт
Кыргызстандын маданият, маалымат, спорт жана жаштар саясаты министрлиги 2026-жылы мамлекеттик тилде анимациялык фильмдерди түзүүгө 50 миллион сом бөлөт. Бул тууралуу Жогорку Кеңеште министрдин орун басары Марат Тагаев билдирди.
Ал белгилегендей, өлкөдө кыргыз тилинде балдар үчүн мультфильмдердин жетишсиздиги байкалууда. Бул маселени чечүү үчүн министрлик заманбап технологияларды колдонууга ниеттенүүдө.
“Жасалма интеллекттин киргизилиши менен анимацияны түзүү процесси толугу менен өзгөрдү жана кыйла жеңилдеди. Бөлүнгөн 50 миллион сомдун 30 миллиону жаңы анимациялык тасмаларды түзүүгө, ал эми калган 20 миллиону дүйнөлүк мультфильмдерди кыргыз тилине профессионалдуу дубляждоо үчүн жумшалат”, – деди Тагаев.
Ошондой эле, министрдин орун басары жылдын аягына чейин бир нече эмес, жүздөгөн мультфильмдер чыгаруу пландалып жатканын белгиледи. Жасалган контент өлкөнүн телеканалдарында жана YouTube платформасында балдар аудиториясына жеткиликтүү болот.
Мындай демилгелер кыргыз тилинде сапаттуу контентти көбөйтүүгө, балдардын маданий билимдерин арттырууга жана улуттук баалуулуктарды сактоого жардам берет. Анимациялык фильмдердин өнүгүшү, балдар үчүн кызыктуу жана билим берүүчү материалдарды сунуштоо менен, алардын чыгармачылыгын жана ой жүгүртүүсүн өнүктүрүүгө өбөлгө түзөт.
