Бишкекте «Даамдуу» тамактануучу жайында 17 адам ууланды, алардын 4ү

Бишкекте «Даамдуу» фастфуд жайында 15-январда 17 адам, анын ичинде 4 бала, ууланган. Бул тууралуу Кыргызстандын Саламаттык сактоо министрлигинин оорулардын алдын алуу жана мамлекеттик санитардык-эпидемиологиялык көзөмөл департаменти маалымдады.

Маалыматка ылайык, 13 адам ооруканага жаткырылып, стационардык дарыланууда, 4 адам амбулатордук шартта медициналык жардам алууда. Уулануу белгилери жабыркагандардын арасында 15-январда ар кандай убакта пайда болгондуктан, алар республикалык клиникалык инфекциялык ооруканасына кайрылышкан. Бардык жабыркагандарга зарыл медициналык жардам көрсөтүлүп, лабораториялык изилдөөлөр үчүн клиникалык материалдар алынган.

Эпидемиологиялык маалыматтарга ылайык, жабыркагандар 15-январда «Даамдуу» фастфуд жайынан сатып алынган шаурманы жешкен. Бишкектеги мамлекеттик санитардык-эпидемиологиялык көзөмөл борборунун адистери аталган тамактануучу жайда пландан тышкаркы текшерүү жүргүзүштү. Фастфуддун курамдык бөлүктөрүнөн, ашкана буюмдары жана жабдууларынан, ошондой эле даяр продукциянын калдыктарынан үлгүлөр алынды. Кафенин кызматкерлеринин ичеги инфекцияларын жугузуп алуу мүмкүнчүлүгүн текшерүү үчүн күтүүсүз текшерүү жүргүзүлдү.

Аныкталган мыйзам бузуулар боюнча 3 протокол түзүлүп, Кыргыз Республикасынын «Мыйзам бузуулар жөнүндө» кодексинин 80, 214-беренелеринин 1 жана 5-бөлүктөрү боюнча 41 000 сомго айыппул салынды. Фастфуд жайынын жетекчисине 15-январдан тартып жайды жабуу боюнча санитардык буйрук берилди, объект пломболонду.

Эпидемиологиялык иликтөө уланууда. Лабораториялык изилдөөлөрдүн жыйынтыктары келген сайын кошумча маалымат берилет. Ведомстводо шаурма жана башка фастфуд тамактары эпидемиологиялык коркунуч жогору болгон продукцияларга кирерин, даярдоо технологиясынын, сактоо шарттарынын, температуралык режимдин бузулушу жана кызматкерлердин жеке гигиенасын сактабагандыгы учурда бул коркунучтун жогорулашы мүмкүн экенин эскертти.

Саламаттык сактоо министрлиги тамактануу тармагында иш алып барган ишкерлерге тамак-аштын коопсуздугу үчүн жоопкерчилик бар экенин, санитардык эрежелерди жана нормаларды так сактоону, өндүрүштүк контролду камсыздоону, медициналык текшерүүдөн өткөн кызматкерлерди гана жумушка алууну сунуштады. Граждандарга тамак-аш продуктыларын текшерилген тамактануучу жайлардан гана сатып алууга, соода жайынын санитардык абалына көңүл бурууга, тамактануудан кийин уулануу белгилери пайда болсо, дароо медициналык жардамга кайрылууга кеңеш берилет.