Агроөндүрүштү кайра иштетүү тармагында миңден ашык жаңы жумуш орундары түзүлдү

‹›

2025-жылдын жыйынтыгы боюнча, Кыргызстанда кооперация, кайра иштетүү, логистика жана механизация тармактарында маанилүү жетишкендиктерге жетилди. Суу ресурстары, айыл чарба жана кайра иштетүү өнөр жайы министрлигинин маалымат кызматы билдиргендей, айыл чарба инфраструктурасы кеңейип, өндүрүш күч алууда жана жаңы жумуш орундары түзүлүүдө.

Учурда өлкөдө 483 кайра иштетүүчү ишкана иштеп жатат, алардын 39у 2025-жылы ачылган. Мындан тышкары, 5 200 чакан ишкана бар, алардын 61и быйыл түзүлгөн. Логистика инфраструктурасы да өнүгүүдө: 40 соода-логистика борбору, 264 жашылча сактоочу жай жана 115 мал союу пункту иштейт. Продукциянын сапатына өзгөчө көңүл бурулууда: 56 ишканада эл аралык сапат стандарттары киргизилген.

Айыл жергесинде кооперация активдүү өнүгүүдө — 821 айыл чарба кооперативи иштеп жатат, алардын 68и жаңы түзүлгөн. Механизация багытында дыйкандарга чоң колдоо көрсөтүлдү: 9 079 бирдик айыл чарба техникасы лизингге берилди, жалпы суммасы 25,2 миллиард сомду түзөт. Ошондой эле өлкөдө 186 механизациялык тейлөө станциясы (мамлекеттик, муниципалдык жана жеке) бар.

Жүргүзүлгөн чаралардын натыйжасында тармакта 31 276 жумуш оруну түзүлдү, анын 1 264ү жаңы жумуш орундар. 2025-жыл кооперация, технологиялар жана туруктуу өнүгүү жылы болуп, өлкөнүн айыл чарба тарыхында өзүнө ылайыктуу орунду ээлеп калды.