Чуй облусунун тургуну аялын сабагандыгы үчүн кармалды

‹›

Чуй облусунун ички иштер башкармалыгынын маалыматына ылайык, Чуй облусунда үй-бүлөлүк зомбулукка шектелген адам кармалды. 2026-жылдын 7-январында Ысык-Ата районунун ички иштер бөлүмүнө А.З. аттуу жаран кайрылып, күйөөсүнө чара көрүүнү өтүнгөн. Ал 1995-жылы туулган. Анын айтымында, 7-январда, болжол менен саат 12:00 чамасында, Ивановка айылындагы үйүндө үй-бүлөлүк талаш-тартыш учурунда күйөөсү А.Э. (1993-жылы туулган) ага дене жаракаттарын берген.

Бул окуя боюнча тиешелүү каттоо жүргүзүлүп, соттук-медициналык экспертиза дайындалган. Экспертизанын жыйынтыгы боюнча, жабырлануучунун денесинде оң жакта төртүнчү кабыргасынын жабык сыныгы, ошондой эле көптөгөн жумшак ткандардын көгала жана сызаттары аныкталган.

Бул факт боюнча Кыргыз Республикасынын Кылмыш кодексинин 177-беренеси (үй-бүлөлүк зомбулук) боюнча кылмыш иши козголгон. Шектүү А.Э. убактылуу кармоо жайына киргизилген. Кылмыш иши боюнча тергөө иштери улантылууда.

Чуй облусунун ички иштер башкармалыгы аялдарга жана жашы жете элек балдарга карата зомбулук жана агрессиянын бардык түрлөрү катуу токтотулуп, күнөөлүүлөр мыйзамдын негизинде жоопко тартыларын эскертет.