Ош шаарында Шамшиева көчөсүндөгү жаңыланган көпүрө пайдаланууга берилди

‹›

Ош шаарынын мэриясы

Ош шаарынын мэри Женишбек Токторбаев бүгүн Ж. Шамшиева көчөсүндөгү көпүрөнү капиталдык оңдоп-түзөөдөн кийин пайдаланууга берди. Мэриядан билдиришкендей, иш-чарага жергиликтүү бийлик өкүлдөрү жана тургундар катышты. Көпүрөнүн узундугу 9 метр, туурасы 21 метр. Эки тарапта жөө адамдар үчүн тротуарлар, жашыл зона, суу түтүктөрү жана ирригациялык лотоктор орнотулган.

Мындан мурда Ж. Шамшиева көчөсү толугу менен оңдолгон. Жолдун узундугу 600 метрге жетип, төрт тилкелүү болуп кеңейтилип, туурасы 22 метрге чейин жеткен. Бул көпүрө аркылуу Ош облустук ооруканасына жана шаарга кирүү бөлүгүнө жетүүгө болот, ошондуктан бул жерде транспорт агымы жогору. Мурда бул жерде оңдоп-түзөө иштери жүргүзүлгөн эмес.

Ош шаарынын мэри Женишбек Токторбаев рейд учурунда жолду кеңейтүү жана асфальттоо боюнча тапшырма берген. Иш-чаранын алкагында тоскоолдук жараткан бир нече имараттар алынып салынган. Натыйжада шаардыктар үчүн ыңгайлуу жана заманбап жол курулган. Ж. Шамшиева көчөсүндөгү бардык оңдоп-түзөө иштеринин чыгымдары жергиликтүү бюджеттен каржыланган.