ГКНБ Таласта окуучулар катышкан окуядан кийин жыйын өткөрдү

‹›

Талас облусунда 29-декабрда Улуттук коопсуздук мамлекеттик комитетинин демилгеси менен кеңейтилген жыйын өттү. Жыйынга облустук жана райондук башкармалыктардын жетекчилери, укук коргоо органдары, билим берүү мекемелеринин өкүлдөрү жана бардык мектеп директорлору катышты. Жыйындын максаты — мектеп окуучулары арасында конфликттерди жана мыйзамсыз аракеттерди алдын алуу.

Жыйында ГКНБ Талас шаарындагы 7-класстын окуучуларынын коомдук тартипти бузгандыгы боюнча териштирүү жүргүзүп жатканы маалымдалды. Окуучулардын видеоматериалдары социалдык тармактарда тарап, коомчулукта чоң резонанс жараткан. Текшерүү көрсөткөндөй, жаштар арасындагы мыйзам бузууларды алдын алуу боюнча мамлекеттик органдардын иши жетишсиз деңгээлде жүргүзүлгөн. Жаштардын руханий жана адеп-ахлактык тарбиясы боюнча талаптар бузулган.

Ошондуктан ГКНБ мыйзамсыз жүрүм-турумдун себептерин жана шарттарын жоюу боюнча чечим кабыл алды. Чечимдин алкагында төмөнкү чаралар көрүлдү: Талас шаарындагы №5 орто мектептин директору жана ГОВДнын орун басары кызматтан бошотулду; шаардык билим берүү бөлүмүнүн жетекчиси жана №5 мектептин социалдык педагогуна дисциплинардык чаралар колдонулду; ички иштер органдарынын төрт кызматкерине эскертүү берилди; инцидентке катышкан жаштар профилактикалык каттоого алынды; алардын ата-энелерине мыйзамга ылайык айыппулдар салынды.

Жыйындын катышуучулары системалык чечимдерди талап кылган маселелерди талкуулашты: мыйзам бузууларга жакын турган жаштарды эрте аныктоо; мектеп жетекчилеринин жеке жоопкерчилигин жогорулатуу; билим берүү жана ички иштер органдарынын өз ара аракеттенүүсүн күчөтүү; мектептерде буллинг, зомбулук жана агрессивдүү жүрүм-турумду алдын алуу; коопсуз жана жагымдуу билим берүү чөйрөсүн түзүү.

ГКНБ мындай кырдаалдардын алдын алуу жана билим берүү мекемелеринде профилактикалык иштерди күчөтүү үчүн шашылыш чараларды кабыл алуунун маанилүүлүгүн белгиледи.