Бишкектеги милиция жана муниципалдык кызматтар Жаңы жылдын алдында өзгөчө режимге өттү

‹›

Бишкекте жаңы жылдык майрамдар алдында Ала-Тоо аянтында ички иштер башкармалыгынын (ИИМ) кызматкерлеринин гарнизондук жыйыны өткөрүлдү. Бул жыйын коомдук тартипти сактоо жана жарандардын коопсуздугун камсыздоо үчүн уюштурулган. Иш-чарага шаар мэри Айбек Джунушалиев, ИИМ башчысы Азамат Токтоналиев, анын орун басарлары, район акимдери жана шаардык кызматтардын жетекчилери катышты.

Шаар башчысы жаңы жылдык майрамдар учурунда укук коргоо органдарынын ишин күчөтүүнүн маанилүүлүгүн белгиледи. Ал коомдук тартипти камсыздоо, эл көп чогулган жерлерде, соода жана эс алуу борборлорунда мыйзамдуулукту сактоо зарылдыгын айтты. “Сиздердин кесипкөй мамилеңиздердин, биргелешкен ишиңиздердин жана кызматтык милдеттерге жоопкерчиликтүү мамиле кылууңуздардын аркасында жаңы жылдык майрамдар тынч жана коопсуз өтөт. Ар бир шаар тургуну жана коногу жаңы жылды жакшы маанайда жана коопсуз шартта тосуп алууга тийиш”, – деди ал.

Бишкек милициясынын патрулдук кызматына жаңы жылдык майрамдар учурунда жол кыймылынын коопсуздугун камсыздоо боюнча күчөтүлгөн көзөмөл жүргүзүү тапшырылды. Ошондой эле, мас абалында унаа башкарууну алдын алуу боюнча профилактикалык жана рейддик иш-чараларды активдештирүү тапшырылды.

Төтөнчө кырдаалдар министрлиги жана акимияттарга эл көп чогулган жерлерде өрт коопсуздугун камсыздоо боюнча иштерди күчөтүү тапшырылды. Муниципалдык инспекция райондук акимияттар менен биргеликте санитардык нормаларды жана белгиленген эрежелерди сактоо менен стихиялуу сооданы токтотуу боюнча иш-чараларды уюштурууга милдеттендирилди.

Жыйынга 600дөн ашык милиция кызматкери катышып, 45 унаа тартылган. Жаңы жылдык майрамдар учурунда шаардык милиция расмий түрдө күчөтүлгөн кызмат режимине өтөт. Иш-чара салтанаттуу жүрүш менен аяктады.