Бишкекте аймак аралык таксилердин ишин тартипке келтирүү боюнча рейд өткөрүлдү

‹›

Ленин районунда, мэр Айбек Джунушалиевдин тапшырмасы боюнча, такси кызматтарын жөнгө салуу максатында рейд өткөрүлдү. Мэриянын маалымат кызматы билдиргендей, рейд учурунда такси айдоочуларына жүргүнчүлөрдү тыюу салынган жана белгиленбеген жерлерде отургузуу мыйзам бузуу экендиги түшүндүрүлдү. Аларга жүргүнчүлөрдү атайын уюштурулган автостанцияларда гана тейлөө керектиги эскертилип, коомдук коопсуздукту камсыздоо, тартипти сактоо жана транспорт агымын жөнгө салуу максатында бул чаралар көрүлүп жатканы айтылды.

Рейдге Бишкек шаарынын ички иштер башкармалыгынын патрулдук кызматкерлеринин өкүлдөрү катышып, коомдук тартипти сактоого жардам беришти. Текшерүүнүн жыйынтыгы менен мыйзам бузгандарга карата 5 протокол түзүлдү. Мындай иш-чаралар шаардагы тартипти сактоо, жүргүнчүлөрдүн коопсуздугун камсыздоо жана такси кызматтарынын мыйзамсыз ишмердүүлүгүн алдын алуу максатында туруктуу өткөрүлүп турат.

Мэрия такси кызматын мыйзамдуу негизде жүргүзгөн айдоочулар үчүн лицензияларды берүүдө артыкчылык берилерин белгиледи. Ал эми мыйзамсыз иш жүргүзгөн айдоочуларга лицензия берүү сунушталбайт.