Дүйнөдө жаңы грипп толкуну башталды. Жаңы вирус штаммы кандай коркунучту?

‹›

Жаңы грипп толкуну дүйнөнүн бардык континенттерин каптады. Бул сезондо көптөгөн учурлардын себеби болуп, жаңы, өтө кооптуу вирус штаммы саналат. Австралия жана Жаңы Зеландияда H3N2 штаммынын жаңы түрү аныкталган. Андан кийин Япония жана Британияда да оору жайылып, азыркы учурда бул вирус 30дан ашык өлкөдө катталды. Мурда бул штамм сейрек кездешкендиктен, адамдарда ага каршы иммунитет жетишсиз.

Британияда ар бир жумада миңдеген адамдар ооруканага түшүүдө. Грипп вирусу дайыма мутацияга учурап турат, жана дарыгерлер бул өзгөрүүлөрдү байкап, жаңы вакциналарды иштеп чыгууга аракет кылышат. Кээде вирус кескин өзгөрүүлөргө учурап, адамдар арасында кеңири жайылып кетиши мүмкүн. Кембридж университетинин патогендердин эволюциясы борборунун директору Дерек Смит H3N2 штаммынын жети мутацияга учураганын белгилейт. Ал бул вирус дүйнө жүзү боюнча жайылып кетиши мүмкүн экенин айтат.

Жаңы штаммдын белгилери мурдагы грипптерге караганда оор эмес болушу мүмкүн, бирок ал көп адамдарды оорутушу ыктымал. Вируска кабылган адамдардын кээ бири симптомдорсуз өтүшү мүмкүн, бирок көпчүлүгүндө жогорку температура, дене оорулары жана тез чарчоо байкалат. Улуу адамдар жана башка оорулар менен жабыркагандар үчүн бул вирус өтө кооптуу болушу мүмкүн.

Грипп, суук тийүү жана COVID-19 симптомдору окшош болсо да, айырмачылыктар бар. Суук тийүү акырындык менен башталат, ал эми грипп кенеттен пайда болуп, жогорку температура жана дене оорулары менен коштолот. COVID-19 да гриппке окшош белгилерди көрсөтөт, бирок анын өзгөчөлүгү – даам жана жытты жоготуу.

Грипптен коргонуу үчүн эң жакшы жол – вакцина алуу. Бирок азыркы вакциналар жаңы вирус штаммына каршы жетиштүү натыйжалуу болбой калышы мүмкүн. Вакцина алуу симптомдорду жумшартууга жана вирусунун жайылышын токтотууга жардам берет. Япония жана Англияда мектептердин бир бөлүгү жабылды.

Британияда декабрдын биринчи жумасында грипп менен ооруканага кайрылгандардын саны күнүнө орто эсеп менен 2660 адамды түздү. Бул көрсөткүч ноябрдын акыркы жумасына салыштырмалуу 1,5 эсе көбөйдү. Дарыгерлердин болжолдоосуна ылайык, декабрдын 14үнө карата ооруканага кайрылгандардын саны 5-8 миңге жетиши мүмкүн. Британиянын башка бөлүктөрүндө да оорулардын саны тез өсүүдө. Көптөгөн оорукана жана мектептерде бет каптарды кийүү милдеттүү болуп калды.