Кыргызстан жана Венгрия азык-түлүк өнөр жайындагы кызматташтыгын бекемдешет

‹›

Бишкекте Венгриянын элчилигинде венгер-кыргыз азык-түлүк өнөр жайы боюнча форум өтүп жатат. Бул иш-чаранын максаты – эки өлкөнүн ишканаларынын ортосундагы кызматташтыкты өнүктүрүү жана тажрыйба алмашуу.

Форумга Венгриянын белгилүү компаниялары, анын ичинде Maurer Gép, Kavali жана Unimatik катышууда. Алар заманбап жабдыктарды жана жемиштер менен жашылчаларды кайра иштетүү боюнча инновациялык чечимдерди сунушташат. Иш-чарада ишкерлер ортосунда түз байланыштарды орнотуу, биргелешкен долбоорлорду талкуулоо жана продукцияны кайра иштетүүнүн алдыңкы технологиялары менен таанышуу мүмкүнчүлүгү түзүлдү.

Кыргызстандын Суу ресурстары, айыл чарба жана кайра иштетүү өнөр жайы министрлигинин кайра иштетүү өнөр жайы жана органикалык айыл чарба департаментинин директору М. Чыналиев катышуучуларга ишкерлер үчүн жеткиликтүү финансылык колдоо чаралары жана министрлик тарабынан азык-түлүк тармагын өнүктүрүү үчүн ишке ашырылып жаткан программалар тууралуу маалымат берди.

Форумдун негизги максаты – венгер-кыргыз бизнес өнөктөштүгүн бекемдөө, инвестиция жана технологиялык байланыштарды кеңейтүү, ошондой эле Кыргызстандын кайра иштетүү өнөр жайын жакшыртуу үчүн алдыңкы чечимдерди киргизүү.