Кыргызстандагы бажы кызматы заманбап цифралдык чечимдерди киргизүүдө

‹›

Кыргыз Республикасынын Мамлекеттик бажы кызматы реформаларды активдүү жүргүзүүдө. Бажы кызматы классикалык контролдоо моделинен заманбап, кызмат көрсөтүүгө багытталган системага өтүүдө. Бул өзгөрүүлөрдүн негизги максаты – өлкөнүн экономикалык кызыкчылыктарын коргоо менен бирге, бизнес үчүн ишенимдүү өнөктөш болуу.

Бажы тармагынын санариптештирүү процесси активдүү жүрүп жатат. Бардык операциялар электрондук форматка өткөрүлүп, автоматташтырылып, адам факторунун таасири минималдаштырылууда. Эл аралык стандарттарга ылайык өткөрүү пункттары жаңыланууда. Бул жерде сканерлөө комплекстери, видеокөзөмөл системалары, радиацияны көзөмөлдөө, салмак-өлчөм системалары жана электрондук пломбалар колдонулууда.

Бизнес процессин жөнөкөйлөтүүгө жана бюрократиялык тоскоолдуктарды азайтууга чоң көңүл бурулууда. “Бирдиктүү терезе” принциби боюнча кызмат көрсөтүү мамлекеттик структуралар менен бизнес ортосундагы өз ара аракеттенүүнү тездетет жана ачык кылат.

“Смарт Бажы” – Мамлекеттик бажы кызматынын маанилүү жетишкендиктеринин бири. 2025-жылдын 1-августунан тартып, бул платформанын үч негизги компоненти ишке киргизилди. “Санарип Тамга” – бул платформадагы негизги куралдардын бири, ал “бирдиктүү терезе” принципи боюнча иштейт. Бул система аркылуу бизнес өкүлдөрү товарлар, транспорт каражаттары жана маршруттар тууралуу маалыматтарды алдын ала жөнөтүп, зарыл документтерди тиркеп коюшат.

“Регистрация” модулу бажы өткөрүү учурунда маалыматтарды автоматташтырууга жооп берет. Бул система товарлардын жана транспорт каражаттарынын кыймылын реалдуу убакытта каттоого мүмкүндүк берет. “Транзит контролдоо системасы” болсо транзиттик декларацияларды тез жана ыңгайлуу толтурууга жардам берет.

Жаңы технологиялык чечимдер да киргизилүүдө. “Достук” өткөрүү пунктунда “Интеллектуалдык өткөрүү пункту” ишке киргизилген, ал транспорт агымдарын реалдуу убакытта башкарууга мүмкүндүк берет. “Кызыл-Кыя” өткөрүү пунктунда “Электрондук кезек” системасы иштеп жатат, ал бизнес өкүлдөрүнө онлайн режиминде чек арадан өтүү убактысын резервдөөгө мүмкүнчүлүк берет.

Электрондук төлөмдөр аркылуу бажы төлөмдөрүн онлайн режиминде төлөө мүмкүнчүлүгү пайда болду, бул процессти жеңилдетип, коопсуз кылат. Жакынкы келечекте Мамлекеттик бажы кызматы электрондук декларациялоо борборун киргизүүнү пландаштырууда. Бул борбор декларацияларды алыстан берүү, убакытты кыскартуу жана бажы органдары менен электрондук форматта өз ара аракеттенүүнү камсыз кылууга жардам берет.

Санарип чечимдерге өтүү Кыргызстандын бажы кызматынын натыйжалуулугун жогорулатат, бизнес жана жарандардын ишенимин күчөтөт, ошондой эле өлкөнүн эл аралык имиджин бекемдейт.