Бишкекке саякатчылар үчүн Vizit Bishkek деген өзгөчө тиркеме пайда болот

‹›

Бишкек шаарында туризмди өнүктүрүү фондунун Дене тарбия, спорт, туризм жана жаштар менен иштөө департаменти жана Кыргызстандагы кол өнөрчүлөр ассоциациясы менен кызматташуу боюнча меморандумдар түзүлдү. Бул документтер борбордун жана региондордун туристтик потенциалын арттырууга, ички жана окуялык туризмди өнүктүрүүгө багытталган.

Келишимдердин негизинде, тараптар бир нече негизги багыттар боюнча кызматташат. Биринчиден, мобилдик колдонмо – Vizit Bishkek түзүлүп, туристтерге көргөн жерлери, маршруттары, кызматтарды брондоо жана экскурсиялар боюнча маалымат берет. Экинчиден, жаштарга жана стартаптарга колдоо көрсөтүү, жаш ишкерлерге финансылык, консультациялык жана эксперттик жардам көрсөтүү пландалууда.

Ошондой эле, шаардык фестивалдарды, маданий жана спорттук иш-чараларды уюштуруу аркылуу окуялык жана спорттук туризмди өнүктүрүү да маанилүү. Бишкекти туристтер үчүн кызыктуу багыт катары илгерилетүү жана борбордун брендин түзүү боюнча маркетинг иштери жүргүзүлөт. Мындан тышкары, мейманканалардын жана ресторандардын кызмат көрсөтүү сапатын жакшыртуу жана туристтик инфратүзүмдү өнүктүрүү да көздөлүүдө.

Бул меморандумдар Кыргызстандын туристтик тармагынын туруктуу өнүгүшүнө жана узак мөөнөттүү кызматташтыкка негиз түзөт.