Чүй облусунда суу менен камсыздоо системасы модернизацияланууда

Чүй облусундагы Торт-Куль айылдык аймагындагы Петровка, Кызыл-Туу, Предтеченка жана Ан-Арык айылдарында ичүүчү суу менен камсыздоо системасынын эскиришине байланыштуу активдүү жаңылоо иштери жүргүзүлүүдө. Бул айылдарда жашаган 14 миң 521 адам үчүн таза ичүүчү сууга үзгүлтүксүз жеткиликтүүлүктү камсыз кылуу максатында, системанын толук алмаштырылышы пландалууда.

Министрлик тарабынан берилген маалыматка ылайык, аталган айылдардагы суу түтүктөрүнүн жалпы узундугу 105 миң 400 метрди түзөт. Бул маселе 2024-жылы өткөн III Элдик курултайда көтөрүлгөн. 2025-жылдан баштап, республикалык бюджеттин эсебинен бул айылдардагы ичүүчү суу системасын толук алмаштыруу үчүн финансылык каражаттар бөлүнөт.

2025-жылга карата министрлик тарабынан 410 пункттан турган иш-чаралар планы бекитилген. Анын ичинен 50 иш-чара (12%) аткарылган, 360 (88%) иш-аракеттер азыркы учурда ишке ашырылууда. Министрликтин маалыматына ылайык, делегаттардын кайрылууларынын басымдуу бөлүгү ирригация (60%) жана ичүүчү суу менен камсыздоо (23%) маселелерине байланыштуу. Бул маанилүү багыттар азыркы учурда ишке ашырылып жатат.